TFG

Se estás cursando 4º de Publicidade e Relacións Públicas deberías ir pensando no Traballo de Fin de Grao que terás que realizar para obter a titulación.

O Traballo Fin de Grao debe servir para amosar dun xeito integrado competencias e coñecementos asociados ó grao correspondente, polo que estará relacionado con un ou varios ámbitos de coñecemento presentes no plan de estudos cursado polo alumnado. O TFG poderá ter unha orientación teórica ou práctica e equivale a 12 créditos ECTS.

Cada un deses Traballos Fin de Grao debe estar supervisado por un titor académico que orientará ó alumnado na temática, metodoloxía, elaboración, presentación e calquera outro aspecto académico relativo ó TFG.

As propostas temáticas para a elaboración dos Traballos de Fin de Grao poden partir dos profesores interesados en titorizar proxectos sobre un ámbito específico ou de alumnos e alumnas coa iniciativa particular de desenvolver o seu TFG sobre unha temática concreta. En última instancia, é a Comisión Específica de TFG creada en cada un dos graos quen determina a asignación de titores.

Co fin de facilitar a vosa selección de tema, proposta de titor ou proposta de tema propio, aquí vos deixo algunhas ideas de base para TFG que me parecen interesantes, das que poden xurdir proxectos persoais amparados na temática xeral e que me gustaría dirixir:

1. Contidos virais: sobre a comunicación viral e as motivacións para compartir contidos en internet.

2. Comunicación e servizo público: sobre a comunicación publicitaria ao servizo de causas sociais.

3. Comunicación e saúde: liña específica sobre comunicación para a saúde dentro da comunicación de servizo público: campañas de prevención, concienciación, fundraising, etc.

4. Medios dixitais e aprendizaxe: sobre o uso de ferramentas e contidos dixitais para a mellora da aprendizaxe

5. Investigación sobre televisión: baixo a denominación de Television Studies agrúpanse todas aquelas investigacións que teñen a televisión como obxecto de estudo. Así pois, baixo esta liña de investigación caben traballos sobre televisión: xéneros televisivos, historia da televisión ou de formatos concretos, o negocio televisivo, a programación televisiva, publicidade televisiva, creación de marca en contidos televisivos, análise de tendencias publicitarias audiovisuais, etc.



Deixa unha resposta

O teu enderezo electrónico non se publicará Os campos obrigatorios están marcados con *

*